Barf si khamoshi main aik awaz ...

by **Shaheen** on Tue Jun 08, 2010 3:05 am

Sardyoon ki dhalti shaam ho ...aur khamoshi ho...ander bahir khamoshi ... itni khamoshi ke ghari ki tik tik bhi shore machati mehsoos hoti hay...itni khamoshi ke seenay main dhak dhak ...kaan kay pardoon pe giraan guzarti hay...itni khamoshi ke saans ki rawish bhi sunaey dayti hay...aisi khamoshi ke zehan main atay khiyal goonjnay lagain...aur aisay main aik awaz ka khiyaal ...kitna mashoor kun lagta hay...

Bahir snow parnay say dabeez barf ki teh main awazain thithar thithar kay jam chuki hain ...aisa lagta hay bahir ki barf mairay ander tak teh dar teh jami pari hay ...aur barf si khamoshi narm roey kay galoon ki manin mujhay hisaar main liyay hay aur main is thandi yakh khamoshi main adh khuli ankhoon kay saath neem madhosh si sansoon main jaisay waqt ki raftar ko thamna chahti hoon kioonke asal main ...main aisay sanatoon say bay zaar ho chuki hoon aur
aisa lagta hay mairi awazoon ka jungle kisi aur dunya main ja basa hay , wo awazain jin ko kaan tarastay hain ...wo ras bhari ...dil moh lainay waali awazain...ke jin say zindigi bolti mehsoso hoti hay ...

muhalay ki masjidoon main " Allah akber " ki takraar ki awazain...gali say riksha , tanga guzarnay ki awazain... sham dhaltay parindoon ki tolyoon ki door jaati awazain...rasooey main choolhay pe charhi handya main hilti doey ki awazain ...
sahailyoon ki choti choti kabhi na khatam honay waali batoon ki awazain...behen bhayoon ki apas ki khat pat ki awazain...dada abbu ki khansi ki musalsal awazain, saath un wazoo kartay hoay paani ki awazain...Tv pe apni raftaar main chaltya hoay ishteharoon ki la parwah awazain...

Aur in mukhtalif pitch ki oonchi neechi awazaoon kay beech ...handya main doey hilati ....ammi ki aik halkay sur main "darood shareef" parhnay ki awaaz ...." sale-e - ala sayedinaaaaa wa sale-e- alaa muhhamadin....sale -e- alaaaa........." dunya -o- mafeha ki awazoon say bay niyaaz sirf aur sirf doey hilati hoey ...darood ki gardaan karti hoey...ammi ki thapki daiti hoey awaz ....
barf si jamid khmoshi main garm narm awaz apna rasta banati hoey kanoo say hoti dil ki jamid sil pe parti hay...aur khushk papRi jamay hontoon pe narm gudaaz sa tabasum ubharta hay...aur ankhoon kay goshoon main chamakti halki si geeli lakeer gaal per dhalkti hay....

is waqt awazoon kay jungle ko cheerti hoey mairay naam ki wo mamta bhari pukaar ...mujhay seenay say lagati hay aur batati hay ke wo mairay paas hay mairay ander ....is barf si khamoshi ki dabeez teh main posheeda hay...aisi jadoey awaz kay hotay kabhi koey tanha ho sakta hay .....nahi ..her giz nahi.

by **sheri566** on Tue Jun 08, 2010 10:30 am

Zaberdast

Main royaa pardes men bhiigaa maaN kaa pyaar
dukh ne dukh se baat kii bin chiTThii bin taar

by **Shehla Ali** on Tue Jun 08, 2010 9:40 pm

Really nice shaheen

Barf si khamoshi main aik awaz ...

Barf si khamoshi main aik awaz ...

Excellent

Re: Barf si khamoshi main aik awaz ...